Selahetin Kruezi

O Selahetin Kruezi si biyando 25.08 1960. Ano gav Mamusha ko Prizren (Kosova). Funduni shkola agorinya ani Mamusha pi Turkikani qhib. Mashkarutni shkola e Gimnaziya agorinya ko Prizren pi Turkikani qhib. Uqi matematikaki shkola agorinya ko Prizren pi srbikani qhib. Ani Mamusha kerya buti 10 bersh. May anglal kerya buti pi Turkikani qhib sar Matematikako, Turkikana qhibyako, Geografiyako sikavno, napal ko agorune 6 bersha sar Matematikako sikavno pi Turkikani thay Albanikani qhib.

Po kamipe vash Roma thay Romengi emancipaciya lela te mothavol 1989. bershesta sar aktivisti e Amalipasko "Durmish Asklano"-ano Prizren.

Anglune butya pi romani qhib lela te hraminel 1990. Bersheste,may anglal poeziye napal drama thay pustika vash qhavore. Anglune poeziye shundile ko Prizren, a olenda may pinjardi sine "O DEVEL PURMINYA PO THAN",poeziya koya arakhlola ani pustik "Sungaven e phuv" kote si hramimo vi o alavari ano panj (5) qhiba ano agor e pustikako. Napal poeziengi pustik vash qhave "Sar tana rovav" kote si hramimo vi o alavari ano panj (5) qhiba ko agor e pustikako.

E drama O Kamipe na puqela ,koya mothavela romenge adetya ano Prizren thay po buhle,hramisali thay angluni var kheldili 06.06.1992. Bersheste ano Prizren thay therya baro suksesi kote o biletya bikisale talo vast.Napal irinela 50 Paramisya e qhavorenge(EZOPI) kote kerya alavari ko agor e pustikako e alavyenda so hramisale o paramisya ano 5 qhiba (Romane, Srbikane, Albanikane, Turkikane thay Anglikane).

O Selahetin Kruezi lela kotor ano laqaripe e romana abecedaki ko Prizren thay sine yekh e iniciyatorenda vash te putaryol romani shkola ko Prizren thay po buhle. Lela iniciyativa vash nikalipe e biltenesko "Romano alav" (1992), kova sine aqhilo 10 bersh bi iklilo thay ayeka jivyarde yekh buti koya telyardili 1972. Bersh.

1992 beshesta o Selahetin Kruezi vestinela (jivdinela) ani Danimarka pe nyameya. Sar ano Prizren agyahar vi ani Danimarka telyarela po aktivipe sar angle. May anglal putarya Romani shkola, napal o lil "Progres" kova hramisalo ano 4 qhiba, yekh olenda sine vi romani, kote mothavdilo e romengi situaciya ano Balkan.Napal hraminela o Pustika: Nyamenge butya, Matematika 1, Siklova hramipe thay drabaripe. Drabar vash pustika. O sistemi thay o hramya sar hraminela o Selahetin Kruezi si odova so kerela e Romani qhib standardizuimi thay yekh var vash sakana o Roma te hraminen agyahar sar manglape te hraminen. Akale sistemeya thay abecedaya adive kerelape buti ani Kosova sar ano mediye agyahar vi ano shkole.

Vash te ovel po baro aktiviteti e romenca kola vestinena ani Danimarka, o Selahetini putarela Romana Kulturako Centri-EUROMA-Kopenhagen vash te kedel e romen te keren aktiviteti. Sar anglalbershutno e RKC EUROMA may anglal hraminela e drama Euroma koya mothavela e romengo jivdipe ani Evropa thay po buhle kolaki premiyera dendili ko Novembri 1997. bersheste. Napal putarela o Radio Radio EUROMA kote kerela buti sar redaktori. Ko 2003. bersheste purarela vi angluni TV ani Danimarka pi Romani qhib thay vi othe si redaktori.

O Selahetin Kruezi si direktori e Nakhavipasko thay Nikalipaske kheresko "EUROMA"ani Danimarka thay kerela buti sar nakhavno ano 5 qhiba: Romane, Albanikane, Yugoslaviake qhibyende, Turkikane thay pi Danikani qhib.

Olesko may baro suno si te putaryon Romane shkole vash te siklon o Roma odova so siklona sare ano pere qhiba.

Baht thay sastipe